آخرین مطالب
امکانات وب
حســن رحمـــانی ام. 1353اینجی ایلده شوردره کندین ده آنا دان اولموشام.ایللردی هنر ساحه سينده اوزلليك له شعر ساحه سینده چالیشیرام و اینانیرام کی هنر اینسانلارین دونیایه باخیشلارین قیاس اتمه گه بیر گوجلو اولچو اولا بیلر
لطفا اوز نظرلریزله بو وبلاگی دیرلندیرین..09141026325
اینان منی
دانیب داماردا قان منی
اینان منی اینان منی
آغ گونشیم اولدو قارا
دردلریمه یوخدو چارا
هئچ بیلمیرم گئدیم هارا
آتیب بوتون جهان منی
اینان منی اینان منی
سانجیلدیم(1) بیر سرین اوخا
ایستی قانیم آخا آخا
نامرد آوچو باخا باخا
ائتدی اوخا نشان منی
اینان منی اینان منی
دونیا دولاندی گؤزومه
چاره قالیب بیر دؤزومه
ائشیلیرم اوز اوزومه
سانکی ووروب ایلان منی
اینان منی اینان منی
دونیا منه اؤگئی اولدو
بیر قارانلیق اوزون یولدو
گول آچمامیش غنچه سولدو
یازدا ووردو خزان منی
اینان منی اینان منی
منی اوجا داغدان سوروش
یاخشی یامان چاغدان سوروش
سینه مده کی داغدان سوروش
چالیر سازدا اوزان(2) منی
اینان منی اینان منی
قایالاردان سیلدیریمدان
یئندییمدن چیخدیغیمدان
قار قیروودان ایلدیریمدان
بورویوبدی دومان منی
اینان منی اینان منی
اوزون یولدان قیسا یولدان
یورولمایان قیچدان قولدان
همی ساغدان همی سولدان
قوودو توتدو قووان منی
اینان منی اینان منی
یاشیل یاشیل مئشه لردن
گونوزلردن گئجه لردن
توزاناقلی کوچه لردن
پوزدو سیلدی پوزان منی
اینان منی اینان منی
دوشمنیمدن دوستدان سوروش
تویدان سوروش یاسدان سوروش
آینا لاردان کاسدان سوروش
یقین دانیب زمان منی
اینان منی اینان منی
اوزو قارا بختدن سوروش
دؤشه گیمدن تختدن سوروش
کتابی آچ حقدن سوروش
سوروش سنی قران منی
اینان منی اینان منی
بوندان آرتیق یورما منی
سئوال آتدا قویما منی
بیر اوزومدن سورما منی
بئله یازدی یازان منی
اینان منی اینان منی
نئچه ایللردوزدن آیاز
دوزمه لیسن هله بیرآز
اجل گلر چکرتاراز
توپراق ائدر یالان منی
اینان منی اینان منی